في مسلسل سقوط حر كانت نيللي كريم لما بتقابل موقف صعب قوي بتشوف نفسها بتعوم أوبتجري على البحر وبعدها عقلها بيحصل له انتكاسة وتدخل في مرحلة الصدمة وبتنسى الموقف الصعب ده..
أنا عاوزة اعمل حاجة مشابهة انزل البحر واختفى هناك بجسدي أو بعقلي أوبكلاهما
وهناك عاوزة أقفل مخي
عشان
تعبت من القلق والتوتر والتفكير في الجاي واللي فات
من المناقشات والمجادلات
من الناس الأغبياء اللي مش عاوزة تفكر ولا عمرها هتفكر
من الناس اللي عاوزة تعبد أي صنم وتمجده
من التعليقات المستفزة والنظرات الأكثر استفزازا
من الأسئلة الكتيرة اللي ملهاش أي اجابة
تعبت
من رغبة غبية ملحة في الاصلاح والتغيير
ومن أمل سرابي أن ممكن حاجة تتصلح
بيتكسر على أول موجة وتفوق
وتكتشف أنك حتى مش عارف تصلح نفسك
عشان تفكر في غيرك
تعبت
من كونك طوال الوقت مطالب تأخد موقف ما من شىء ما
وبتتصنف على أساس كل موقف
تعبت
من أني مش عارفة أهدى في أي مكان
وأني بافتكر
بافتكر حاجات كتير قوي
مخي كله تفاصيل أحداث وحوارات وأفكار
تعبت من الفلاش باك والله
ومحاولة استنتاج ليه ده حصل
وعشان ايه
وأنا غلطت في ايه وهم غلطوا في ايه
وايه اللي كان ممكن اعمله عشان تتغير النهاية
وايه اللي كان ممكن يعملوه
وأصلا هل كانت النهاية هتتغير ولا هي مكتوبة على الجبين
تعبت
من الشغف والتعلق بحبال الهواء الدايبة
من السراب اللي كل امسكه يهرب مني
ومن النور اللي كل ما أقرب منه يطفي
تعبت
من فرحة مش عاوزة تكمل
وخازوق في كل ركن
وابتسامة متعرفش وراها ايه
أنا فعلا تعبت
واللي تعبني أكتر من كل ده
أني عارفة أن الدوامة هتستمر
وأن مفيش نهاية أبدا
وأن مفيهاش راحة بجد
حتى معرفش اللي بيموتوا بيرتاحوا فعلا
ولا بيتعبوا أكتر من الندم على اللي معرفوش يعملوه واللي غلطوا فيه
ولا مش بيحسوا بحاجة خالص
هي دنيا بس صعبة، والله صعبة قوي
وأنا تعبت وعاوزة اختفي بأه
Advertisements
أحيانا يكون هذا أغلى أمأنينا أن نختفي .. ربما هذه الرغبة عائدة إلى الرغبة في التحرر من الطين .. الانعتاق من قيود المادة .. رغبة مشتركة حتى إشعار آخر