من الحاجات اللي مكنتش بألاقي اجابة عليها هي أن ازاي الرسول (ص) في رحلة المعارج شاف ناس في الجنة وناس في النار والقيامة لسه مقامتش أصلا
والناس دي ممكن تكون لسه مماتتش على الاسلام عشان تتحاسب عليه..
في ناس قالت أن ممكن الرحلة دي كانت سفر عبر الزمن للمستقبل
الفكرة التانية اللي وضحها فيلم
Interstellar
واللي شفتها في مسلسل
Being Erica
هي فكرة البعد الخامس اللي هو الاحتمالية (البعد الرابع هو الزمن)


يعني للتوضيح نتخيل أني
قمت الصبح من النوم (حالة 0)
قمت الصبح من النوم وقررت أدخل على الفيس بوك فتأخرت على الباص ورحت المحاضرة متأخر (حالة 1)
أو قمت الصبح من النوم ولحقت الباص بس عمل حادثة ورحت المستشفى (حالة 2)
وأنا في المستشفى قابلت فارس أحلامي الطبيب هناك (حالة 3)
بس لو تابعنا حالة واحد هنلاقي أن هناك خرجت مع أصحابي بعد المحاضرة ووقعت على السلم (حالة 4)
وهكذا توجد ملايين الحالات بناء على اختياراتنا والأحداث التي تحدث من حولنا
وفي البعد الخامس كل الحالات دي موجودة
كأنك مشغل مليون سيناريو مختلف بناء على حدث هنا وحدث هناك
لو كسرت حاجز الزمن هتسافر للمستقبل والماضي في نفس الحالة بتاعتك
لكن لو كسرت البعد الخامس ممكن تتنقل بين الاحتمالات كمان
يعني فرضا أني اكتشفت بعد 50 سنة في حالة 2 أني مش عاوزة أتزوج الطبيب ده، فأرجع لحالة 0 واختار أني مركبش الباص عشان ميحصلش أني أقابله وبكده ممكن امشي في احتمال تاني …

وده علاج المشكلة بتاعة إذا كان احفاد احفادنا في المستقبل جم في زماننا وعملوا حاجة عشان ينقذوا الأرض ازاي أصلا بأه هم اتولدوا؟ أو في مسلسل أريكا ازاي اريكا وهي عندها 40 سنة زارت أريكا وهي عندها 30 سنة وخلتها تختار اختيار معين في حين أن أريكا أصلا كانت هتكون ماتت قبل الأربعين من غير الاختيار ده؟

الاجابة أن أحفاد أحفادنا موجودين في احتمالية من الاحتمالات في البعد الخامس زي ما أريكا عايشة وهي عندها 40 سنة في احتمالية من الاحتمالات برضه وميتة في احتمال تاني ..

كل ده طبعا معظمه خيال علمي وإن كان له أساس نظري
ايه علاقة ده بأه بالاسراء والمعارج والسؤال بتاع ازاي الرسول شاف ناس بتتعذب في النار والقيامة مقامتش لسه؟
العلاقة أن في ناس بتلحد عشان بالنسبة لها الكلام ده كله أساطير وغير علمي..
الملايكة والوحي والجنة والنار والمعجزات الخ الخ
والناس دي بتتريق على المؤمنين اللي مؤمنين بالأساطير دي بأنهم سذج
بس الفكرة أن ازاي الناس من 1400 سنة اللي مكنش عندهم أفلام الخيال العلمي ولا النظريات بتاعة النسبية والسفر عبر الزمن والاحتمالية صدقوا الكلام ده وآمنوا بيه وأنت اللي بدأت تكتشف قليلا امكانية حدوثه مش قادر تتخيله؟

يعني مثال تاني أسهل:
أنت دلوقتي بكاميرا ديجتال متقدمة ممكن تسجل كل لحظات حياة أخوك اللى لسه مولود فيديو ولما يكبر تذل أمه بيها ..شوف وأنت بتسحمى في الطشت الأحمر، شوف وأنت معرفش بتعمل ايه…
طبعا من 1400 سنة مكنش حد يتخيل أنه ممكن يسجل أحداث صوت وصورة ويعرضها تاني بعد سنين (اللي هو مفهوم الحساب في الدين) ورغم كده الناس صدقت أن في رب عالمين قادر أنه يسخر ملكين يكتبوا كل أفعالك وأقوالك، يعني المفروض أنت دلوقتي لما اكتشفت علميا امكانية ده تحس أنها مش حاجة صعبة على الإله لو كان فيه إله أنه يعملها ..الموضوع كله هارد ديسك كبير قوي عشان يساعي بيانات كل البشر وكاميرات بتراقب كل واحد مزروعة في مكان خفي(بمفهمونا احنا)

أنا مش مع موضوع التعمق في الاعجاز العلمي في القرآن خاصة من غير المتخصصين أمثالي … بس أنا كل اللي بأقوله أن مترفضش الدين عشان في حاجات فيه (غيبة) أنت مش شايف أنها تنفع علميا ..ﻷن احنا أصلا لسه في حاجات كتير العلم لم يصل لها ولم يكتشفها عشان نقدر بمنتهى اليقين ننفي أو نثبت به وجود الاله وكذلك منقدرش ننفي أو نثبت بالعلم معظم الأمور الغيبة التي تحدث عنها القرآن، اعتقادي الشخصي أنها ستظل قضية غير محسومة علميا للأبد …
فلو كان هناك دليل 100% على وجود الله فأين الاختبار؟

زي معجزات الرسل زمان…ناس أول ما تشوف المعجزة تؤمن أن ده رسول وناس تقول أنه سحر .. طيب ما هو ممكن فعلا يكون سحر؟! مكنوش يعرفوا زمان يثبوا 100% أنه سحر ولا مش سحر … وإلا فين الاختيار؟ اعتقد أن الايمان مرتبط باستعداد الناس لتطبيق المنهج فلو لم يوافق المنهج هواهم يبقى تفسير السحر أقرب لعقولهم

You End Up Believing What You Want to Believe
You bias your interpretation of evidence toward what you desire.
دي فكرة فيلم
Life of Pi
اللي كانت قضيته اثبات وجود الاله برضه
https://dinasaid.com/…/life-of-pi-%D8%AD%D9%8A%D8%A7%D8%A9-…/

 

About Dina Said

دينا سعيد حاصلة على الدكتوراة من قسم علوم الحاسب، بجامعة كالجارى في كندا، كما أنها أحدى مؤلفي كتاب "من أوروبا البلد" . دينا لديها شهادات كندية معتمدة في تقديم المساعدة الأولية للأمراض النفسية والتعامل مع حالات الانتحار ومساعدة المجتمع بالاضافة إلى أنها حاصلة على عدة جوائز تقديرا لدورها في المجال التطوعي بكندا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s