وأنا صغيرة كنت باحب أشوف الأفلام

مكنتش بأسيب فيلم..أبيض وأسود على ألوان

أفلام …أفلام

فى الفيلم البطل بيحب البطلة

بس فى واحد شرير عاوز يتجوزها

ساعات مرات أبوها هى اللى شريرة

ساعات ناس وحشيين يختطفوها

ساعات ناس شريرين يغدروا بالبطل

كلها أفلام ..أفلام

وانا صغيرة كانت ماما بتقولى خلى بالك من الوحشيين

كنت فاكرة أن الأشرار زى كده ما بيطلعوا فى الأفلام

شكلهم وحش أو صوتهم وحش

بيزعقوا وبيعملوا حاجات كتير غلط

بافتكر كمان المسلسلات

أبو العلا البشرى

الراية البيضاء

ضمير أبلة حكمت

كان فاضل شوية ويكتبوا على جبين الوحشيين أنهم أشرار

بس كلها أفلام…أفلام

لما كبرت بقيت مش فاهمة حاجة

هى ليه الدنيا مش زى الأفلام

هو إزاى اللى بيعلمنى الخير ويوعظنى يطلع مزور وحرامى ونصاب؟

هو إزاى اللى بيحفظنى قرآن يطلع خاين وعميل وجبان؟

هو إزاى صاحبى اللى بيحبنى يستغلنى ويطعنى فى ظهرى؟

 تهت وقعدت ألف حوالين نفسى وأنا لسه مش فاهمة حاجة فى أى حاجة

أقول هم ليه ميعملوش جزء تانى من مسلسلات زمان؟

يخلوا أبلة حكمت نصابة وحرامية لكن أحنا اللى مكناش واخدين بالنا

وأبو العلا البشرى مجنون بالعظمة وفكر نفسه حاجة وهو ولا حاجة

أما الحاجة فضة فأصلًا الفيلا بتاعتها ودكتور مفيد هو اللى كان سارقها منها

مش بذمتكم كده الأفلام  والمسلسلات تكون ماشية مع الحياة؟

أفلام…افلام

قعدت ألف وأدور

هو إيه الصح؟ وإيه الغلط؟

وليه اللى بيقول الصح بيعمل الغلط؟

وإزاى الصح يبقى صح وحتى اللى بيقوله مش بيعمله؟

وليه زمان علمونا أن الدنيا أبيض وأسود بس؟

ليه محدش قلنا أنها رمادى بكل الدرجات؟

بيقولولى اعرفى الحق بنفسك وملكيش دعوة بالناس والأفلام

مش مهم مين اللى بيقوله ومش مهم بعد ما قاله عمل إيه

ولا قبل ما بيقوله كان بيعمل إيه

المهم أن ده الحق اللى لازم تمشى عليه

أقول لهم بس أنا زعلانة عليهم

يقولولى الدنيا ممكن تفتن أى حد

فخافى فى يوم لتفتنى زيهم

هى ليه الدنيا بقت صعبة كده؟

وليه مرجعش صغيرة ..باتفرج على الأفلام

وأفرح لما البطل يغلب الأشرار

ويتجوز البطلة ويعيشوا فى تبات ونبات

بس هيهات…هيهات

أن تعود أيام الطفولة والراحة والأفلام

دينا سعيد

12-8-2012

About Dina Said

دينا سعيد حاصلة على الدكتوراة من قسم علوم الحاسب، بجامعة كالجارى في كندا، كما أنها أحدى مؤلفي كتاب "من أوروبا البلد" . دينا لديها شهادات كندية معتمدة في تقديم المساعدة الأولية للأمراض النفسية والتعامل مع حالات الانتحار ومساعدة المجتمع بالاضافة إلى أنها حاصلة على عدة جوائز تقديرا لدورها في المجال التطوعي بكندا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s